Popatah Potitih 30 Jun 2014: Ibadah Puasa

30 June 2014

Kok moncaghi poso yang hebat
Jauhkan sifat dongki kianat
Jauhkan sifat dondam kosumat
Potuah amanah wajib diingat
Potunjok agamo wajib dibuek
Luguih kan hati elokkan niat
Kepado Allah mohon rahmat

Popatah Potitih 28 Jun 2014

28 June 2014

Kok ondak moncolop solendang
Ingat-ingat ghagi ae hilang
Kok hidup ondak topandang
Ingat-ingat budi baik oghang

Popatah Potitih 27 Jun 2014

27 June 2014

Lopeh salah dek botimbang
Lopeh tobat dek boghungkai
Lopeh hutang dek bobayar
Bukan hutang budi nan bosukat
Bukan hutang kain nan bohasto
Bukan hutang ghinggit nan bobilang
Hutang adat nan posako
Hutang budi dongan bahaso

Popatah Potitih 26 Jun

26 June 2014

Dalam kehidupan seharian
Tunaikan utang kok anak bini
Tunaikan hak dighi sondighi
Tunaikan kowajipan jangan monanti

Popatah Potitih 25 Jun

25 June 2014

Apo tando oghang nan koji
Lain di mulut lain di hati
Hati bebulu lidah bekelok
Hati busuk lidah tobalik
Lidah ae solalu botukar-tukar
Kok bocakap menggulung lidah
Kok bojalan menumit langkah
Kok bokawan menderhako
Kok bogaul mengambik muko
Kok bokojo bermuko duo

Popatah Petitih 23 Jun

23 June 2014

Bukan adat anak Melayu
Menjual anak dongan omeh
Menukar anak dongan peghak
Menggadai anak dengan intan suasa

Popatah Potitih 22 Jun

22 June 2014

Solagi kuek piko lah boban
Solagi bojayo caghiklah pongotahuan
Solagi sehat solosaikan pokorjaan
Solagi bonyawo ingatlah tuhan

Popatah Potitih 20 Jun 2014

20 June 2014

Bilo tahu membaleh budi
Tak akan ado oghang mongoji
Oghang monoghimo bosonang hati
Hidup beghamai oghang momuji
Totapi ingatlah wahai sahabat
Botanam budi jangan mengumpek

Popatah Potitih 15 Jun 2014

15 June 2014
Moncughah air ko daun koladi
BiloMoncughah gagham ko laut
Hujan jatuh ko pasir
Molopeh anjing tosopit
Monabur bonih ateh batu
Umpamo oghang campak bungo
Di baleh campak dongan taik

Popatah Potitih 12 Jun

12 June 2014

Bilo kulit dah kondo
Bilo mato dah kabo
Bilo gigi dah gugo
Bilo uban solalu botabo
Bilo solalu yo uzo
Bilo koghap disuap bubo
Itulah tando akan ke kubo

Popatah Petitih 11 Jun

11 June 2014

Bersatu teguh bercerai ghoboh
Muafakat bertambah borkat
Bosatu bertambah mutu
Mengkhianat akan dilaknat
Alah biso togah biaso
Berbahaso kito bobangso
Mombunoh akan dibunoh
Ikut ghaso binaso
Ikut hati mati
Ikut nafsu losu
Ikut sodap mongidap
Ikut maghah paghah

Popatah Potitih 10 Jun 2014

10 June 2014

Supayo solamat hidup di akhirat
Banyak mongkaji seghoto solawat
Quran dibaco sunnah diingat
Jauhkan segalo sifat yang sosek

Popatah Petitih

9 June 2014

Carilah pancang untuk alamat
Lopehkan balam di muko tingkap
Hendak mengukur balam dihutan
Balam disangkar dilambungkan
Poganglah janji dongan amanat
Hati yang mabuk bawa mengucap
Konanglah haghi yang kemudian
Esok badan akan bertanggungan

Popatah Potitih

8 June 2014

Raja berdaulat dalam alam ea
Ponghulu menobat dalam suku ea
Buapak menobat dalam anak buah ea
Oghang banyak menobat dalam teratak ea
Bukit samo didaki, lughah samo dituruni
Gantang samo ditolok, cupak samo dipawai
Adat samo dikatokan
Botimbang samo boghek
Bobagi samo banyak
Godang boghek samo ditatang
Ringan samo dilotakkan
Olek rajo totap kito laksano
Akan dijunjung soponoh-ponoh kopalo
Akan dipikul sountuk-untuk bahu

Popatah Potitih

Popatah Potitih disampaikan oleh Prof Madya Datuk Paduka Dr. Mohd Rosli Saludin menerusi radio Negeri FM

Yang mano kijang yang mano napoh,
Yang mano datang yang mano ghompoh
Yang mano koghingat yang mano poloh
Yang mano tanam yang mano tumboh
Yang mano labu yang mano kundur
Yang mano sapo yang mano togur